طلع مش مأذون.. الداخلية تجيب صاحب فيديو «قول ورايا يا عريس» اللي قلب السوشيال ميديا

فاكرين فيديو كتب الكتاب اللي انتشر على السوشيال ميديا، والمأذون فيه بيقول للعريس «قول ورايا يا عريس»، وبعدها ينطق لفظ خارج يخلي العريس يتصدم والعروسة تتكسف؟ الداخلية كشفت مفاجأة عن صاحب الفيديو.

الحكاية بدأت لما الفيديو انتشر بشكل كبير، والناس فضلت تتكلم عن تصرف الشخص اللي ظهر فيه، لحد ما اتكشف إن الراجل ده مش مأذون شرعي من الأساس، وإنه منتحل صفة مأذون.

الأجهزة الأمنية فحصت الفيديو، ونجحت في تحديد هوية الشخص وضبطه، وتبين إنه مقيم في محافظة الجيزة.

وبمواجهته، قال إنه مش مأذون شرعي، وإن شغلانته إنه بيعمل فقرات ترفيهية وهيصة في قاعات الأفراح علشان يفرّح الناس، وإن كتب الكتاب الرسمي بيكون من خلال مأذون شرعي معتمد.

وعلى إثر الواقعة، اتخذت الأجهزة الأمنية الإجراءات القانونية اللازمة ضده، لتنتهي حكاية الفيديو اللي شغل الناس على السوشيال ميديا بكشف حقيقة الشخص اللي ظهر فيه.