راحت تظبط جوزها مع ستات في الفيلا.. اختفت من 2019 لحد النهاردة
"تعالي بسرعة.. جوزك في الفيلا ومعاه ستات".. مكالمة واحدة غيرت حياة مروة بالكامل، ومن بعدها اختفت كأن الأرض انشقت وبلعتها، ولسه لغز اختفائها محير أهلها لحد النهاردة.
الحكاية بدأت سنة 2019، لما مروة بنت المنوفية كانت حامل في شهرها السابع وعايشة مشاكل مستمرة مع جوزها، بعد ما اكتشفت إنه رافض فكرة الحمل من الأساس، ووفق رواية أسرتها كانت بتتعرض لضغوط ومشاكل خلتها تسيب البيت وتقعد عند أهلها فترة طويلة خوفًا على نفسها وعلى الجنين.
في آخر ليلة شافتها فيها عيلتها، جالها اتصال من حارس الفيلا الخاصة بجوزها في مركز تلا وقالها إن جوزها موجود هناك مع سيدات، مروة اتوترت وقررت تروح بنفسها تشوف الحقيقة.
بعد ما وصلت كلمت أختها وقالتلها إن المكان حالته غريبة وفي بقايا أكل وحاجات مبعثرة، وكمان لاحظت وجود حفر قريبة من الفيلا، لكنها طمنتهم إنها هترجع اليوم اللي بعده.
اليوم ده مجاش أبدا.
من وقتها تليفون مروة اتقفل واختفت تمامًا، وأهلها لما راحوا الفيلا لقوا متعلقاتها الشخصية موجودة، من شنطة وبطاقة وتليفون، لكن مفيش أي أثر ليها.
مرت سنوات طويلة وأسرة مروة لسه بتدور عليها، خصوصًا بعد وفاة والدها ووالدتها وهم مستنيين يعرفوا مصير بنتهم، هل مازالت على قيد الحياة ولا حصلها مكروه في الليلة الغامضة دي.
💬 التعليقات 0